Kuri uyu wa kabiri tariki 17 Werurwe 2026, ku biro by'Akarere habereye amahugurwa yahawe Abayobozi ba Komite zigira uruhare mu kubungabunga umutekano (Community Policing Committees) bazahugura abandi bagize izo Komite. 

Ayo mahugurwa agamije kubongerera ubumenyi mu bijyanye no gukumira no kurwanya ibyaha. Bahuguwe n'itsinda ry'abakozi baturutse ku Cyicaro Gikuru cya Polisi y’u Rwanda mu Ishami rya Community Policing na Minisiteri y’Umutekano bari bayobowe na Senior Superintendent of Police (SSP) Jean Claude Kabandana. 

Yatangijwe n’Umuyobozi w'Akarere wungirije ushinzwe iterambere ry’ubukungu, Nshimyimana Jean Baptiste. Ayasoza, Umuyobozi w'Akarere wungirije ushinzwe imibereho myiza y’abaturage, Mwanangu Theophile yashimye Inzego zahuguye abayobozi b'izo Komite, abasaba gushyira mu bikorwa ubumenyi bungutse, kurangwa n'imikorere n'imikoranire myiza n'Inzego zikorera mu Karere mu kubungabunga umutekano.

SSP Kabandana yabasabye kurushaho gufatanya n’izindi nzego zikorera mu Karere kurwanya ibikorwa byo gutunda, gukwirakwiza, gucuruza no kunywa Kanyanga n’ibindi biyobyabyenge, gukurikirana imikorere y'irondo, kurwanya magendu, ubusinzi, ubujura, ruswa; kandi bakarwanya ibinyobwa bitujuje ubuziranenge.

Yababwiye ati:"Igihe muganira n’abavandimwe n’abaturanyi banyu ntimukabure kubabwira ingaruka zo gutunda, gukwirakwiza, gucuruza, kunywa no gukoresha ibiyobyabwenge; mubabwire ko bitera umutekano muke n’amakimbirane mu miryango, ubukene no gukora ibyaha binyuranye biviramo bamwe gufungwa. 

Yagize kandi ati:"Mujye mubibutsa ko iyo umuntu afunzwe azira kwishora mu biyobyabwenge cyangwa gukora ibindi bitemewe n’amategeko bitamugiraho ingaruka wenyine; ahubwo ko bidindiza iterambere ry’umuryango we kubera ko iyo afunzwe aba adakora; ahubwo ko abagize umuryango bibatwara igihe ndetse n’amafaranga bakoresha bajya kumusura aho afungiwe; mubagire inama yo kwirinda ikintu cyose kitemewe n’amategeko."

Yabasabye kujya bababwira kandi ingaruka z’amakimbirane; babereka ko atera ubukene, ukutumvikana, ukudashyira hamwe no kutajya inama hagati y’abagize umuryango; babereka ko bidindiza iterambere ry’umuryango; kandi ko biri mu bitera abana kureka ishuri; bamwe mu bana bagahitamo guhunga imibereho mibi n’umutekano muke biri iwabo; bakajya kwibera ku muhanda cyangwa gukora imirimo ibavunnye kugira ngo babone amaramuko; mubagire inama yo kwirinda icyo ari cyo cyose cyaba intandaro y’amakimbirane.

SSP Kabandana yabasabye na none kujya babakangurira kwirinda magendu; babagaragariza ko igira ingaruka ku iterambere ry’Igihugu kubera ko abayikora baba batatanze imisoro; babagire kandi inama yo kureka kwambuka umupaka bitubahirije amategeko; igihe bashaka kujya hanze y’Igihugu bakanyura ku mipaka yemewe.

Yabashimiye uruhare runini bagira mu kubumbatira umutekano; abasaba kurushaho gufatanya n’inzego z’ibanze n’inzego z’umutekano gukumira no kurwanya icyahungabanya umutekano; abibutsa ko guhanahana amakuru ku gihe ari ingenzi kuko bituma inzego zifatanya gukumira no kurwanya ibyaha; ndetse no gufata ababikoze.

Yabwiye ko umwarimu mwiza ari utanga urugero rwiza; bityo, nk’abagize Komite zo kubungabunga umutekano bakwiriye kuba intangarugero n’indakemwa kuko ari bwo ibyo bigisha bizashyirwa mu bikorwa; abasaba kandi kuzasangiza ubumenyi bungutse abo bahagarariye.

Komite zo kubungabunga umutekano (CPCs) zashyizweho n’Iteka rya Minisitiri N° 02/07 ryo mu 2007.